[Tips on Busking]
無論你係一個幾有經驗既樂手，係香港既街頭表演，有更多關於你果門藝術既認識，都會有助你成為一個成功既表演者。所以，係你出去表演之前，有幾樣野係值得你去注意既。
• 唔駛講，好既表演就會自然吸引到觀眾。你搵個細路幫你搖下沙鎚，或者對著觀眾微笑下，呢 d 看似微不足道既野，都會吸引到更多觀眾去睇你表演。
• 如果你打算係一間餐廳旁邊 busk 的話，就要準備多幾首歌啦（大約一個鐘至個半鐘）。如果你係間海邊既酒吧出面不停 loop 四首歌，就緊係唔 work 啦大佬。
• 多 d 試下係唔同地方玩。好似長洲，赤柱，南丫島呢比較少 buskers 既地方其實都係可以一戰既。咁唔只會令 busking 更有趣，你仲可以比較下係唔同地方玩既收入添。
• 係星光大道你係唔可以收錢架，即係會有「食蕉」黎趕你走，你玩唔到好耐架。
• 除非你想做 d 無人做過既野，多數既人都係會想聽到 d 比較開心同 up-beat 既歌既。不過如果你唔鍾意呢味，又唔介意收少 d 錢，咁你可以玩返 d 自己 style 既歌既。
• 係一幅牆面前 set-up ，好似圖中既阿 Jim 咁，會令到你 d 聲正 d 架，尤其係你唔插 amp 果陣。
• 記住做足事前準備，要帶食物，水，仲有電池呀。搵個近少少廁所既位，咁就唔會唱到急尿無地方去啦！
• 著靚 d 啦，你可以著 casual d 不過普常 d 人見到你著得試正 d 都會尊重你多 d 既。
• 通常係真正賺錢之前，busker 會放少少錢係個袋度，令觀眾明白你係收錢既。
• 如果你有自己既 facebook 專頁又好，卡片又好，又或者其他既媒體，咁你都可以趁機宣傳下既。香港地咁細，你可以 show 你個名出黎，咁 d 人就會開始認得你，又或者支持你既音樂架啦。
• 如果你插 amp 同朋友一齊玩，你可以試下行遠少少部 amp 聽下 d 聲，咁你聽完之後就會知道點汁靚 d 聲架啦。
• 通常，愈非典型既樂器愈好。由小提琴二重奏到管樂團，從二胡到迪吉里杜管甚至係電子音樂，香港都有人玩。如果你想突圍而出，你就要試下啦。
• 最重要既係唔好因為無人睇而攪到自己灰哂。要堅持呀！
作者 Ryan Harling
翻譯 Benson Ho
