兔仔加持 成人勵志
ToNick《在幸福中出發》樂評
OKAY，究竟咩嘢可以跨越時空地域限制，令十𡃁歲後生仔，到四、五十歲嘅麻甩佬每晚沉迷，夜媽媽匿喺被竇自己一個研究，open啲嘅仲捉埋兄弟閂實房門交流？能夠以高潮&技術&喘聲將一眾男仔connect嘅，梗係——音樂啦！
無錯判大家正經level嘅話，上面呢段嘅開頭應該都唔足以引起大家遐想；慶幸文字留白之力不只是「文章」專利，仲有其他媒介可以大玩特玩，例如ToNick 新歌《在幸福中出發》就以一段段搞鬼歌詞引人入「性」！
流行樂隊嚟講，ToNick嘅social media經營得幾好，定期出post、成員間搞吓清談影片同fans互動，仲有同其他media合作等等。門面兼顧到，音樂都無怠慢：走tour、參加大大小小音樂祭、每隔兩、三個月出新歌，上首歌仲喺MV到大玩AI，跟得幾貼。但無論門面定音樂，近幾年ToNick嘅動向都唔算太有記憶點，上首歌用埋AI gimmick都冇太大迴響。而今次新歌，借用聯乘安全套品牌嘅聰明marketing策略，加埋巧妙嘅食字歌名，令呢隊童心未泯、創作魂未熄嘅band再次走入大家眼中，尤其喺海報覆蓋率極高嘅旺角站乘客。
《在幸福中出發》，單聽歌名尚未諗歪，但睇埋poster中佔一半篇幅、冠名贊助嘅日本安全套品牌，加埋恆仔手上個隻白色「兔仔」& 海報仿AV字體——呢首歌唔似表面咁簡單！男士們深明一個道理：Do not judge an adult music video by its cover！咁就聽真啲驗證吓係咪心中諗嘅個回事啦！
「從雙峰到絕嶺
從深山中覺醒
從熱帶暴雨 吶喊
大冒險家 不怕夜晚」
ToNick四子包辦新歌曲詞編監，結他手小龜兼任填詞一角大玩情色意象，做人造人哲學俱備，冇返咁上下（成人網站）閱歷都寫唔出。「出征、蝌蚪脫變、雙峰絕嶺、緊握樹幹、魚找到水、花海被窩」等想入非非嘅歌詞背後，ToNick新歌一貫有熱血在其中，唔講大道理說教，直接喺MV化身「夢遺使者」鼓勵大家勇敢出征——或者夠膽談情說性追逐愛情，亦會有勇氣面對人生其他困難。
「就奮力抱實你 活過就注定要出征
就約定
就約定於這花海
就約定
就約定於被窩內」
新歌Intro似枕邊耳語，單音結他伴奏配恆仔輕聲入陣，差啲以為《在幸福中出發》屬典型樂隊情歌之列，直至前奏尾段歌詞露白，新歌終定調玩味本「色」，由ToNick帶領大家探索男仔情色幻想。除咗Intro輕聲引人入「性」外，新歌喺高潮同Outro都有考驗恆仔唱功嘅哋方，高潮嗰句「劇烈的感應」嗌得幾有feel，係一個搖滾樂隊主唱該有嘅情緒演繹，而Outro「就約定」後嗰句嘅輕聲轉換，喺前面吼叫下就略感聲薄，若非有意以此為特色，感覺力度分配上可稍為調整更入耳。
能夠將一首「甜歌」唱得勵志熱血，都係ToNick本事，恆仔熱血唱腔、晨㬢正氣max氣場、小龜妙筆、Ryan呆呆書生feel固然關鍵，但主要有賴呢隊band堅持一貫特色——夠貼地夠玩味。「情色」題材四子十幾年前就開始玩（《我不能忘記你》aka Thisav懷念之歌），到今日榮升麻甩佬後再以《在幸福中出發》挑逗眾人，都不感歌曲有污穢之意，聽完更覺有種正能量在其中，流行樂隊中能以Rock生動演繹成人題材，野佬之後可能就數到ToNick。
講開又講，中佬band定位從來微妙（Yes, ToNick冇你想像咁年輕了），熱血喺年青沸騰後被既定要沉穩成熟，或至少蘊釀出一啲「發人深省」嘅睿智，呢啲印象或多或少會限制歌曲風格同演繹；所幸ToNick冇扮大人，喺音樂上貫徹自己玩味風格，其實此舉已足夠展現四子成熟一面。今次新歌，題材夠gimmick、行銷marketing引人注目、結他solo乾淨、MV得意，而且Bass手Ryan亦從外國「歸隊」亮相⋯⋯種種元素可唔可以令《在幸福中出發》成為ToNick又一首「流行經典」呢——得出答案之前，ToNick更應該注目嘅，係成員間對「新歌海報被冠名贊助安全套品牌佔據一半篇幅」嘅真實感受，盡數榨取當中延伸出來對樂隊&音樂嘅深層諗法放於歌曲創作上，或許就可以打破「ToNick近年冇咩記憶點」論調嘅缺口。
Article by 劉海亮
(2025年8月19日 )
| Spotify | YOUTUBE | Apple Music | KKBox |
